முல்லைத்தீவு – புதுக்குடியிருப்பு சுகாதார வைத்திய அதிகாரி பணிமனைக்குட்பட்ட பிரதேசத்தில், ஏற்கனவே விடுக்கப்பட்ட எச்சரிக்கையை மீறி அழுகிய பழங்களை விற்பனை செய்த குற்றச்சாட்டில் கைவேலி பகுதியில் உள்ள பழக்கடை உரிமையாளரொருவருக்கு 5,000 ரூபா அபராதம் விதிக்கப்பட்டுள்ளது.
நகரை அண்டிய சந்தை பகுதியில் உள்ள பழ வியாபாரிகளுக்கு, பழுதடைந்த மற்றும் அழுகிய பழங்களை விற்பனை செய்யக் கூடாது என சுகாதார அதிகாரிகள் முன்னதாகவே எச்சரிக்கை வழங்கியிருந்தனர். எனினும், அதனை மீறி ஒரு பழகடையில் அழுகிய பழங்கள் விற்பனை செய்யப்பட்டதாக பொதுமகனொருவர் எழுத்து மூலமாக சுகாதார வைத்திய அதிகாரி பணிமனைக்கு முறைப்பாடு செய்திருந்தார்.
இதனையடுத்து, பொது சுகாதார பரிசோதகர்கள் கைவேலி பிரதேசத்திலுள்ள குறித்த பழக்கடையில் நேற்றையதினம் திடீர் சோதனை மேற்கொண்டபோது, அழுகிய நிலையிலிருந்த பழங்கள் வெளிக்காட்டி வைக்கப்பட்டதுடன், அவை ஏற்கனவே விற்பனையிலும் இருந்தது கண்டறியப்பட்டது.
இதனைத் தொடர்ந்து கைப்பற்றப்பட்ட பழங்கள் தொடர்பாக முல்லைத்தீவு மாவட்ட நீதிமன்றத்தில் நேற்றையதினம் (31.10.2025) வழக்கு தாக்கல் செய்யப்பட்டபோது, நீதிபதி குறித்த கடை உரிமையாளருக்கு 5,000ரூபா அபராதம் விதித்ததுடன், கடுமையான எச்சரிக்கையுடன் விடுவித்தார்.
இவ் நடவடிக்கையில் கோம்பாவில் பொது சுகாதார பரிசோதகர் ஆ. சுரேஸ் ஆனந்தன் மற்றும் உடையார்கட்டு பொது சுகாதார பரிசோதகர் பிரதாஸ் ஆகியோர் இணைந்து செயற்பட்டிருந்தனர்.
